काठमाडौं । प्रमुख प्रतिपक्षी दल नेपाली कांग्रेसका सभापति शेरबहादुर देउवाले सिन्धुपाल्चोक पहिरोको जिम्मेवारी सरकारले लिनुपर्ने बताउनुभएको छ ।
प्रधानमन्त्री निवास बालुवाटारमा भएको भेटवार्तामा देउवाले सिन्धुपाल्चोकको जुगल गाउँपालिकाको लिदिमा पहिरोमा परेर दर्जन बढी जनताको ज्यान गएको र कयौं बेपत्ता भएका विषयमा प्रधानमन्त्री केपी शर्मा ओलीको ध्यानाकर्षण गराउदै उक्त कुरा बताउनुभएको हो ।
सभापति देउवाले गाउँबासीले १० दिन अघिदेखि सुरक्षित स्थानमा सार्न सरकारलाई गुहार गर्दा पनि सरकारले कुनै ध्यान नपुर्याउनु अत्यन्तै दुखद् भएको देउवाले बताउनुभएको हो । यति गम्भीर गल्तीको जवाफदेहिता सरकारले लिनुपर्छ कि पर्दैन?’भन्दै देउवाले प्रधानमन्त्रीलाई भनेको भेटमा सहभागि केन्द्रिय सदस्य रमेश लेखकले बताउनुभयो । भेटमा देउवाले देशको अन्य विभिन्न भागमा बाढी पहिरोले जनधनको क्षति गरेको र सरकारको भूमिका सन्तोषजनक नदेखिएको बताउनुभएको छ । उहाँले प्रधानमन्त्रीलाई व्यवस्थित र प्रभावकारी ढंगले कार्य गर्न आग्रह गर्नुभएको छ ।
यस्तै कोरोनाबाट मृत्यु हुनेको संख्या सय नाघेको भन्दै तिव्र गतिको संक्रमण रोक्न सरकार समर्थ नदेखिएको देउवाले टिप्पणी गर्नुभयो । कमजोरीको समीक्षा गरेर नयाँ रणनीति निर्माण गर्न र कामको गति बढाउन सरकार किन गम्भीर छैन ? आइसोलेसन र भेन्टिलेटर पर्याप्त व्यवस्था गर्न किन ढिलाइ ? देउवाको भनाइ उद्धृत गर्दै कांग्रेसले विज्ञप्तिमा भनेको छ।
त्यस्तै त्रिभुवन विश्वविद्यालयमा देखिएका विवाद र विसंगति उपर कुलपतिका रूपमा प्रधानमन्त्रीको ध्यान पुग्न जरुरी रहेकोसमेत कांग्रेसले भनेको छ। विद्यार्थीलाई थुनामा राख्ने अनि विविध माग राखेर २६ दिन देखि पोखरा विश्वविद्यालयमा अनशनमा बसेका नेविसंघका विद्यार्थीहरुसँग संवाद समेत नगर्ने यस्तो बलमिच्याई प्रवृत्ति प्राज्ञिक थलोमा नसुहाउने भन्दै देउवाले अविलम्ब संवादबाट समाधानमा पुग्न ढिलाइ नगर्न पनि ध्यानाकर्षण गराउनुभएको हो । यस्तै प्रधानमन्त्री ओली र सभापति देउवाबीच रिक्त रहेका संवैधानिक आयोगका नियुक्तिबारे छलफल छ
यी हुन् सभापति देउवाले प्रधानमन्त्रीको ध्यानाकर्षण गराएका विषयहरु :
१.सिन्धुपाल्चोकको जुगल गापाको लिदिमा पहिरोमा परेर दर्जन बढी जनताको ज्यान गएको छ र कयौं बेपत्ता छन् । गाउँबासीले दश दिन अघि देखिनै गुहार गर्दा पनि तिनलाई सुरक्षित स्थानमा सार्न सरकारले ध्यान नपु¥याउनु अत्यन्तै दुःखद भएको छ । यति गम्भीर गल्तीको जवाफदेहिता सरकारले लिनुपर्छ कि पर्दैन ?
देशको अन्य विभिन्न भागमा बाढी पहिरोले जनधनको क्षति गरेको छ । सरकारको भुमिका सन्तोषजनक देखिएन । ब्यवस्थित र प्रभावकारी ढंगले कार्य गर्न आग्रह गर्दछु ।
२. कोरोनाबाट मृत्यु हुनेको संख्या सय नाघेको छ, संक्रमण तीब्र गतिमा बिस्तार भएको छ । बढ्दो चुनौती सामना गर्नसक्ने ढंगले कार्य गर्न सरकार समर्थ देखिएन । कमजोरीको समिक्षा गरेर नयाँ रणनीति निर्माण गर्न र कामको गति बढाउन सरकार किन गम्भीर छैन ? आइसोलेसन र भेन्टिलेटर पर्याप्त ब्यवस्था गर्न किन ढिलाइ ?
३. त्रिभुवन विश्वविद्यालयमा देखिएका विवाद र विसंगति उपर कुलपतिका रूपमा प्रधानमन्त्रीको ध्यान पुग्न जरुरी छ । निश्चित विधि र संस्कृतिले विश्वविद्यालय चलाउने क्षमता भन्दा राजनैतिक पुर्वाग्रह बढी देखियो । प्रजातन्त्रवादी प्राध्यापक संघको सभापति लगायतलाई मुद्दा लगाउने, राखिएका जायज मागहरुको सुनुवाइ नगर्ने, किर्तिपुर देखि ठाकुरराम क्याम्पस सम्मका विद्यार्थीलाई थुनामा राख्ने अनि विविध माग राखेर २६ दिन देखि पोखरा विश्वविद्यालयमा अनशनमा बसेका नेविसंघका विद्यार्थीहरुसँग संवाद समेत नगर्ने यस्तो बलमिच्याई प्रवृत्ति प्राज्ञिक थलो सुहाउँदो छैन । अविलम्ब संवादबाट समाधानमा पुग्न ढिलाइ नगर्न म प्रधानमन्त्रीजीको ध्यानाकर्षण गराउन चाहन्छु ।
